到咗今時今日，我唔知仲有幾多香港人會話政治唔關自己事。我明白大家抗拒政治嘅原因，因為政治可以好複雜，但並唔係一個藉口比自己唔理社會時事。關心政治唔代表一定要你知道台灣局勢、中美關係、英國政策，因為你要明都唔係睇一日半日新聞就搞得掂。其實你每日由打開個電視到出門口返工，政治冇一刻喺你身邊離開過：睇新聞見到通脹、搭車發現貴咗幾毫子、你住緊棟樓嘅業主話下個月加租、返工出加薪通知發現今年加嘅人工一張金牛都冇。你可能會埋怨生活真係艱難，做到隻狗咁都改善唔到生活，但其實你有冇諗過當中背後嘅原因？政治唔係學問，而係生活一部份，如果你以為政治唔關自己事，只要日日返工放工為生活就可以，其實你根本就係逃避現實。 自由有乜用？自由唔係淨係比你擁抱。一味話做人要有自由，但比自由你嗰陣，你又唔去用就真係嘥氣。點解香港港有言論自由有集會自由？其實就係用嚟比你表達自己嘅意見。之前港鐵禁止大型樂器上車最後惹嚟一大班音樂人出嚟抗議，喺大圍站玩樂器。你要得到有樣嘢首先就要爭取，連嗰班離晒地嘅音樂人都知嘅道理，以醒目自居嘅香港人有咩理由會唔明。 港鐵每幾日就壞一兩次，壞完西鐵就到東鐵，你唔明佢有咩理由仲可以加價，你覺得好嬲但又唔出嚟抗議；你覺得樓價好貴，喺外國買到千幾二千呎海景豪宅嘅價錢，喺香港得番三百呎都冇嘅低層樓景屋，你覺得唔係人買、唔係人住，但你應付嘅方法只係每個月再死慳死抵，想儲多一兩千，然後睇下幾時樓價回落少少，有機會就狗衝買樓。依班人好聽啲咪政府口中嘅良好市民，但老實講同個白痴有咩分別？ 細個你做乖仔起碼都有人請你食粒糖買件玩具比你，都叫做有著數；而家你做住個「好市民」，但女又冇樓又冇連車都冇位泊唔到、出街食餐飯想食好少少都要睇住銀包、想學財爺講生活品味飲咖啡最後拎住嘅唔係星巴克而係罐裝雀巢。你盡晒好市民責任啦，結果政府比咗乜野你？七警犯法打人都收全糧二三萬起跳，仲有人地個工會搵成千萬幫佢打官司，但你連想排間公屋都要等番十年八載。依個時候，我真係好想搵達哥捉住袁國強，然後大大聲咁問佢咁樣「公平咩？」 你唔好好用你嘅自由都算，另一班學生另一班市民出嚟抗爭，爭取公義爭取民主，你仲要拎住罐雀巢迫住港鐵咁話人地阻住晒。點解香港人咁鍾意去旅行？無非覺得香港返工辛苦壓力大。咁點解香港變成咁你諗嘅唔係去改變佢，而係純粹靠旅行麻醉自己？彭定康講得冇錯，香港遲早死返喺香港人手上。對於果班仲係一味話生活難但日日照樣咁過，不思進取仲要阻人爭取嘅香港人我只係有一句說話想同你地講。

作者面書專頁： https://www.facebook.com/MaoYanDe